原來當自己中意左10年既管弦樂加小提琴獨奏加自己中意左唔夠兩年既容祖兒加埋一齊係會有咁震撼既效果，我既激動真係難以形容，差少少就有d想喊既感覺，真係未試過。 從來聽容祖兒同聽張學友都有個相同情況，就係冇咩留意背後既音樂，因為呢兩把人聲既變化已經扣人心弦，我實在分唔到心去聽背後既音樂，就算96年張學友同港樂合作既《Love and Symphony》都冇令我感到震撼，可能當時係第一次呢類crossover，於是編曲都比較保守… 今次真係好例外地令我能夠「放開懷抱」，能夠唔啄住個人聲黎聽，真係第一次。
雖然大多觀眾要睇既主角係容祖兒，但個音樂會都照顧到想聽古典既人，而且有兩part係用電子提琴(亦慶幸出黎既效果唔係Vanessa Mae咁…)，opening幾part純音樂已經夠精彩，逐類樂器都show下，但最得觀眾欣賞既都係近尾聲既姚加交響樂團既演出，佢地揀左幾隻超名曲*去串成一隻medley，曲與曲之間既處理亦好有心思，零瑕疵既演出得到當晚最熱烈既掌聲。 (*點解話超名曲？ 因為識得少歌既我都全部數得出。 買兩隻古典小提琴獨奏精選一定有齊呢幾隻歌。) 之前三次聽姚既演出都冇留下好好既印象，今次一次過將我對佢既印象一掃而空，之前見過既技術性瑕疵今次冇哂。
容祖兒進步左… 每逢有「大事件」就進一大步，會令人對佢既期望越來越高呢… 今次既歌難度又高左，雖然唔係每一隻歌都唱得完美，但有瑕疵既大都係要跳舞既歌，高難度仲要跳舞，好有膽色… 演繹方面，以前總覺得CD版好夠感情但略欠power，現場版就powerful d但冇左d感情，一向都覺得咁樣好正常，直至上年既《Reflection of Joey’s Live》聽到《煙霞》等歌曲，驚覺容祖兒應該可以將兩者合一，今次真係做得到powerful既聲音加上如CD版既深情演繹。 當知道音樂會會唱《愛是永恆》呢隻歌都幾凳佢擔心，因為珠玉在前，仲要係兩個唱家班唱過四個唔同既版本，結果冇被比下去真係已經贏左，而且仲唱得非常好。
歌曲方面，我認為《卡門》係最大驚喜，《卡門幻想曲》本來我就中意，我以為今次既《卡門》會編得較嚴肅古典，點知係玩到咁，時空交錯咁，但係聽得好舒服，亦覺得揀容祖兒合作係揀岩左，如果搵個前輩歌手，呢首歌絕唔可以玩成呢個樣仲令如我呢種中意古典既人聽得舒服。 另一首令我有重新感覺既係《怯》，呢首歌我從來冇中意過，一來非常「少女心事」feel，二來歌詞同旋律既變化急得連唱歌感情滿瀉既容祖兒都難以發揮，今次令我刮目相看既原因係編曲更大器之餘，最驚喜係連帶容祖兒呢首歌既演繹都大有進步。 大部份歌曲呢個古典/pop crossover feel都玩得好精彩，編曲人要記個大功。
不得不提既仲有莫拉維亞交響樂團，還記得兩個星期前當容祖兒飛去捷克彩排既時候，當時只得約一半既編曲準備好，其它歌都未有樂譜，咁即係話有一半係靠o係香港既兩日時間同容祖兒同姚夾… 雖然演奏既歌曲可能比古典音樂易一d，但演奏既係一d佢地未試過既HK pop，果丁點時間就練熟之餘，仲捉到每首歌既feel，真係一個好專業既交響樂團。
呢個古典x香港流行樂既crossover，當然預左d人未完歌就拍手同大呼小叫，氣氛係好好既，只係唔知d捷克樂手點諗… 不過都好彩首首歌都兩次掌聲(容祖兒唱完一次掌聲，之後樂團演奏完畢又第二次掌聲)，而且一首接一首既停頓時間可以話幾乎冇，整個音樂會都好流暢，真係一次音樂行先既音樂會。 今次既音樂會一定要買CD同DVD細味，唔知到時會唔會執走左d不合時既掌聲呢？
如果我呢個音樂會”One Live”真係只得”One Love”三個主角既其中一個，呢個音樂會俾我既震撼一定少得多。
最後要多謝一位神秘人令我有幸欣賞今次足本既音樂會。
Recent Comments